خواطر عبيطة

قعدت أفكر في ايه اللي جايبنا ورا ؟؟؟قلت الحرية؟؟

طيب ما دول شرق اّسيا معظمها ماشي علي نظام امبراطوري ديكتاتوري و مع كدة أقتصادهم يدّي اقتصادنا بالجزمة .

و بعدين دول زي أمريكا و بريطانيا مفيهاش حرية حقيقية ولا حاجة بدليل ان اي حد بيعترض علي سياستهم بتبقي وقعتو سودا , والحرب علي العراق دليل تاني علي عدم ايمانهم بحرية الشعوب في تحديد مصائرهم , يعني لو الشعب العراقي الشقيق راضي علي دكتاتورية صدام , يبقي تدخل لييييييييييييييييه؟ سؤال أهبل , عشان النفط طبعا ..

.يبقي مش الحرية , أمال ايه؟؟؟

قلت يمكن تعداد السكان ؟؟؟ معرفش كمان كام سنة هنوصل لل90 مليون.هوا احنا أينعم بنستهبل و كل لتنين يتحوزوا يبقو عيزين يجيبولهم 5 أو 6 عيال , بس ماهو في دول زي الصين تعدادها أكبر مننا و قدرت تحول المشكلة السكانية لطاقة ساعدتهم علي التقدم ...

ايه تاني يا تري ؟؟؟

يكونش معدل الذكاء عندنا أقل من الدول التانية؟؟؟

لقيت مني الشازلي بتعارضني ف برنامجها ال 10 مساءا لما جابت أطفال مصريين قدروا يحصدوا مراكز عليا جدا في مسابقة عالمية يعني عيالنا مش أغبيا ولا حاجة , دا بالعكس الطفل لمصري طلع من أذكي الأطفال علي مستوي العالم كما ورد في الدراسات العلمية .

بس الظاهر ان أطفالنا و رجالتنا في المستقبل أول ما بيدخولوا في مرحلة التعليم بيجلهم هطل ...

يبقي هوووووووووا ده , التعليم ....

طيب ليه تعليمنا هوا سبب تخلفنا؟؟؟

أنا بحب أستخدم أسلوب علمي في التفكير .

التعليم = مدرس + تلميذ

طيب ما تلميذنا = أذكي أطفال العالم

يبقي العيب في المدرس , المدرس اتخرج من الكلية و معاه ملاييين بنفس الشهادة و نفس التقدير ...

يتقدم صاحبنا و معاه كام ميت واحد لشغل وظيفة مدرس في واحدة من المدارس الخاصة , طمعا في المرتب الي بيوصل لكاذا ألف , و تلاميذ ولاد ناس مفيش منهم حد هيرفع عليه مطوا لو سقطو في الأمتحان , و رعاية صحية ليه و لعيلته , الخ الخ ...

و يفضل يحلم كدة لغاية ما يتصدم بالواقع المر ان واحد تاني أتوظف بداله مع اننو أقل منو في التقدير و الخبرة , يسأل ليه ؟؟ يطلع عشان مرات عم أبو أم اللي أتوظف شغال فراش في مكتب سكرتير سكرتير سكرتير الوزير ...

المهم الراجل بيجيلو هلع و يكتئبلو كام سنة يعّد فيهم عالقهوة , و في اللاّخر يرضي انو يشتغل في مدارس الحكومة , و بعد كام سنة تانيين و الحكومة مش راضية توظفوا ( رضينا بالهم) بتجيلوا الوظيفة , و يرتها ما جتلوا ...

يروح المدرسة يعلم الأطفال أهم ما علمته الأيام ألا و هو مبدأ الكوسة...ويبتدي ينجح الواد الفاشل عشان هوا ابن الناظر و يسقط التاني الشاطر عشان مبياخدش معاه درس ...

فيكبر تلميذه الفاشل عشان يبقي دكتور يموت المريض , مهندس يوقع عمارة , رجل أعمال يحط المئات في تابوت مغلق و يرمي بيهم فالبحر ...أما تلميذه الشاطر ييأس و يفشل في حياته و يستخدم ذكائه في أذية الناس زي متأذي ويبقي ارهابي في أسوأ الأحوال , مواطن سلبي ملوش لزمة في أحوال أخري ليست بأفضل من الأولي ...

اذا الكوسة هيا السبب الرئيسي في تخلفنا , طيب بقاومها ازاي ؟ لأ دا لازملو قعدة
…………………………………..